點分石塑地板優劣

石塑地板（SPC）因為佢嘅性能而成為咗地板市場嘅熱門選擇。不過，香港同大陸有咁多牌子，質素亦參差不齊，點樣分辨佢嘅好同唔好就變成咗消費者一大挑戰。小編整理咗以下一啲重要考慮因素同分辨方法，希望幫到大家揀到優質嘅石塑地板。

優質嘅石塑地板應該用高品質嘅原材料，例如用全新純淨嘅石粉同PVC樹脂，製造出嚟嘅石塑地板應該要有較高嘅密度、良好柔韌性同穩定性，唔易變形。地板橫切面應該平滑無雜質，鎖扣部分唔會太脆易斷。 你亦可以睇下產品嘅技術數據表（Technical data sheet），確保佢哋無有害物質，例如甲醛或重金屬等。

生產技術係影響石塑地板質量嘅關鍵因素之一。優質嘅石塑地板通常用先進嘅多層結構壓製工藝，耐磨層表面亦會加上抗UV塗層，優質抗UV塗層可以提供到更好嘅抗刮同抗氧化能力。 同時，卡扣設計應該緊密無縫，以避免安裝過程中出問題，因為卡扣強度不夠，很容易就斷裂。如果標明係採用國際大廠專利卡扣（例如比利時 Unilin 或瑞典 Väling 公司專利技術）會比較有保障。

 

好嘅石塑地板表面處理應該均勻，紋理清晰，反光度低，色澤一致。如果能加上同步壓紋技術，鋪出嚟嘅效果更加自然逼真。 而表面太平滑會影響防滑效能。

石塑地板嘅防水性同耐磨性係評價佢好同唔好嘅兩個重要指標。你可以進行簡單嘅測試，例如將兩件地板收扣好再用水潑地板表面接駁縫位或放入水裏面睇下佢防水性能，或者用硬物劃地板表面測試佢嘅抗刮性能，而耐磨層厚度最好要有0.5mm。

石塑地板通常於底層都會直接附有靜音墊，目前大多會採用IXPE、EVA或是軟木 (Crok) 三種。IXPE泡綿係新型嘅環保高分子材料，相比起EVA材質更加環保、安全且無異味，更加耐用、隔音效果亦較好。至於軟木比起以上兩種更加環保，不過吸音及防潮性能相對最弱，亦不會提供到緩衝能力同會有老化情況。

揀石塑地板嘅時候，可以睇下產品有無相關嘅國際認證，好似 CE、ISO、FloorScore 等認證，呢啲認證可以證明產品符合一定嘅質素同安全標準。 而一份正式全面測試報告可以更加幫助了解產品嘅實際性能，亦可以辨別產品上的認證標籤真偽，咁就買得更加放心。

消費者評價同品牌聲譽係揀優質石塑地板嘅重要參考因素。你可以通過網絡查詢產品嘅使用評價，了解其他消費者嘅使用體驗同反饋。仲有，揀一個有良好聲譽嘅牌子都可以降低買到劣質產品嘅風險。

優質嘅石塑地板應該從具有良好信譽同服務態度嘅公司購買，確保能為你在安裝或日後使用過程中遇到嘅問題能夠得到幫助處理。如果直接經師傅買或者會少咗一份保障。

分辨石塑地板需要綜合考慮多方面因素，包括材料成分、生產技術、外觀質量、防水同耐磨性能、產品認證、消費者評價同售後服務。只有充分了解同比較之後，先至可以揀到優質又適合自己嘅石塑地板。 其實大部分優質嘅石塑地板都係一分錢一分貨，質素高嘅價錢都貴啲。較便宜嘅，可能係採用比較差嘅原材料，或者用較差嘅靜音墊。而且有啲高質素嘅石塑地板牌子會少啲係店舖出現，因為佢哋主要客群係設計公司或者則樓，所以大家可能要用多啲心機去揾😅